Paglipad

Ikaw ang lupang kayumanggi

Perlas ng silangan

Sa dayuha’y paraiso

Pinagpala ng Maykapal

Bundok, patag, at dagat

Sa yamang likas ay sagana

Ngunit ang nais ko’y maglakbay

Sa lupaing banyaga

Sa katuparan ng masaganang bukas

Kaya’t paalam bayan kong Pilipinas

‘Pag ako ay nariyan

Para bang suntok sa buwan

Ang umasa sa mga pinuno nami’t mambabatas

Di ko nais ang maluho’t

Marangyang pamumuhay

Brilyante, ginto at pilak

Mga magarbong kotse’t bahay

Hangad ko lamang ang gumising

Sa isang bagong araw

Na mahal kong mag-anak

Sila kong natatanaw

At ika’y di na kailangang lisanin

Na di tiyak ang sa malayo’y sasapitin

Sa’yo sana ay sapat

Pagkayod ko ng puyat

Lahat sana’y maging tapat sa kanilang tungkulin